參觀戶外展覽

因為工作關係，少咗時間可以寫blog，不過幾忙都好，我都盡量會抽時間帶媽去睇下唔同嘅戶外展覽。 4月就去咗金鐘添馬公園參觀『teamLab：Continuous 光連』。 

 網上登記後，我哋提早去到，趁天未黑，可以望下未著燈嘅蛋蛋。 

行到差唔多夠鐘，就行去排隊入場，沿路見到嘅工作人員，好多都好主動及好有禮貌。

 7點鐘入到去，大家都比預期中興奮，無論男女老幼都想攬住隻蛋。

今次呢個展覽，整體安排得唔錯，由準備入場到離場，所見到嘅工作人員，好多都好主動幫市民及旅客，最緊要係笑容及語氣都好親切，真難得！

2月就參觀咗『Chubby Hearts』嘅巨型飄浮大紅心，可惜當日去到天色灰暗，見唔到藍天白雲，所以睇出嚟就一般。

後來有一晚我和媽經過中環，又再行過去睇多次，夜晚又有唔同嘅感覺，可能係因為啲人放咗工嘅關係，感覺好多人都好Chill ，至於日頭睇，就比較趕，啲人打完卡就即刻走。 

2月另一個展覽『提子親子嘉年華』，去到西九文化區海濱草坪時，遠遠已見到好多粒提子，行入場嘅氣氛，個個都變咗小朋友咁，好開心，好想摸，甚至有人追住提子影相。

其中有一對夫婦，將個BB坐係地下同粒巨型提子影相，對比size實在太大，忍唔住我都離遠快拍咗一張。

 西九文化區環境真係好乾淨，好舒服，就算無展覽，平時坐係度睇日落都好正。

總結：戶外展覽真係好睇天氣，夏天濕熱，又多雨水，草地會比較多蚊，所以最好帶備一支蚊怕水係袋，噴定就最穩陣，睇展覽都可以睇得舒服啲。