金鐘添馬公園睇煙花

（2023年10月1日）

時間真係過得好快，原來對上我出去睇煙花已經係2016年嘅年初二煙花，數數手指，已經超過7年半，今年真係好想帶埋媽咪出去感受下現場氣氛，不過我媽怕人多，最後都無出去。最靚睇煙花嘅尖沙咀海旁，聽聞一早已經好多人，仲封埋入口，於是我就自己一個搭車去金鐘添馬公園搏一搏。

搭地鐵去到金鐘站大約係傍晚6點半，估唔到已經有好多人係海富中心對出嘅扶手電梯排隊行上去添馬公園，沿途見到好多人已經坐定定開餐等睇煙花。

而我就行去搵位影相，較靚景嘅位置都已企滿人，插針都插唔入，最後要行到較側較少人嘅位置至可以開到腳架。

雖然位置一般，不過等睇煙花嘅期間，都同附近來自唔同地區嘅遊客及市民傾傾得好開心，當煙花放嘅時候，大家都好興奮，好專心地欣賞煙花，

最後一幕超震撼，當煙花匯演完結時，現場嘅人都拍哂手掌，氣氛係我咁大個人，第一次覺得最正嘅一次！散場時，見到大家都好開心地跟住人群有秩序地離開公園。

總結：太耐太耐無影煙花，真係忘記咗煙花拍攝技巧，仲有太耐無做運動，搞到搖完黑卡後，手臂竟然都酸痛咗兩日，雖然啲相影得唔靚，不過我都影得好開心，因為經過今次影煙花，又搵返自己當年攝影嘅初心，希望下次會再影得好啲！