香港故宮文化博物館

上個月終於抽到時間放假帶媽去參觀香港故宮文化博物館，第一個感覺故宮建築外型都幾特別，

入口嘅紅色拱門都算係最多人打卡嘅位置。

入到館內大堂，見到天花嘅設計，覺得有啲似古代嘅屋頂。

館內有9個展覽，而我今次預先購票訂咗標準門票，參觀專題展覽（展廳1至7）。雖然香港故宮空間規模比起北京及台北嘅故宮博物館細，但係展出嘅珍品卻比我想像中多。

至於交通方面，我都係選擇搭地鐵，不過今次就試咗由九龍站E出口行出去，沿途都有好清晰嘅指示牌，不過無瓦遮頭，所以都幾曬，

如果唔趕時間，又係搭地鐵的話，我都係會建議經圓方商場金區2樓嘅藝術廣場天橋過去西九文化區，沿途會經過M+及藝術公園，感覺舒服好多，空氣都好啲。

總結：香港故宮文化博物館內珍藏展品比我想像中多，如果想要慢慢欣賞嘅話，又或者想用相機影相嘅話，我建議朝早早啲去，最好預係西九一日遊，黃昏仲可以睇埋好靚嘅日落，總之就係「平、靚、正」！