絲綢之路8天遊

十月尾攞咗8日大假，最後決定去「絲綢之路」敦煌、嘉峪關、張掖、吐魯番和烏魯木齊8天純玩團。因為從未去過，而又好想去睇下，加上十月當地天氣無咁熱，對我皮膚嚟講，應該會比較容易應付到。
而今次都係揀跟團去，係因為自己真係唔夠時間去安排行程，唔想搞到自己咁辛苦，首先就揀可以開得成絲綢之路8天團嘅旅行社，然後再比較行程、酒店食宿、車程安排、自費項目、各項收費…等等嘅安排，再作決定。因為大部份嘅旅行社，其實都係乘搭香港快運航空包機，直航敦煌往返唯一住宿嘅酒店及安排乘坐高鐵嘅地區及行程時間有所不同。

最後揀咗旅行社報名後，就開始準備自己嘅行李啦，因為早晚溫差極大，所以都要帶厚和薄嘅衫褲。至於數據卡，我和朋友都決定嚟一個測試，佢用旅行社免費送嘅中移動4G無限數據卡，而我就用香港拍賣網買嘅中聯通嘅8日內地香港4G上網卡$78，一於去到睇下邊張收得好啲！(結果係：中聯通於敦煌接收得好啲，而去到烏魯木齊就兩間都差唔多。)

敦煌嘅酒店，要用兩腳平腳嘅轉插，而烏魯木齊酒店就同香港一樣，三腳插。今次旅遊保險就揀咗經Money Hero 網站內買Zurich單次旅遊保險(金計劃)，因保費有七折優惠。準備好所有嘢後，就開始絲綢8天之旅啦！

10月22日(第一天)

7：35乘搭機鐵到香港國際機場二號客運大樓，排隊辦理行李寄艙(重量不超過20公斤)，過海關出境後，即去近1號登記閘口間 PLAZA PREMIUM LOUNGE 食個早餐先，裝修後嘅機場貴賓室無論食嘅嘢，亦或坐位都比以前多咗，不過入去嘅人亦比以前多咗，要入去就要排下隊先。

食完後，就坐無人駕車去閘口，準備登機10：05準時起飛去敦煌，起飛大約一個鐘就開始派發焗豬扒飯一份及一支礦泉水(飛機餐視乎旅行社有冇包埋，否則就要自費叫嘢食啦)。

由飛機望出去，有一大段時間都係沙漠上空飛行，

大約五小時後到敦煌，導遊就帶大家去月牙泉小鎮，朋友買咗個肉夾饃嚟食，仲大讚好食！食完再食。

然後就坐車去嗚沙山，

著住橙色包沙襪行沙漠，大家行上山丘，然後坐塊木滑沙落去，感覺真係幾刺激。之後慢慢行去參觀月牙泉，

然後就坐車離開，去食晚飯，估唔到絲路之旅都有咁多啱我食嘅嘢，

食飯後去酒店梳洗休息。

10月23日(第二天)

酒店早餐後，就乘坐旅遊巴去敦煌市西南70公里外嘅陽關古城，

係古代絲路南路必經嘅關卡(包電瓶車往返)，之後就去食午餐，繼續坐旅遊車，途經見到風力發電站，好壯觀，

然後食完晚餐，返酒店擺低啲嘢後，就行去酒店附近嘅美市街行吓，感覺唔熱鬧，嘢食亦唔啱我食，都只係行下，就返去酒店休息啦。

10月24日(第三天)

酒店早餐後，就坐旅遊巴去嘉峪關，

 

整個建築由內城、外城、城牆等部分組成，有“天下第一雄關”之稱。當日咁啱有隊人拍緊戲，而我亦趁機影咗幾張相。

然後又去食晏，繼而前往甘肅省張掖丹霞地貌國家地質公園-五彩山，進入景區，一律都要搭景區專車，車輛行駛為單循環線，

 

而我哋亦只係遊覽其中3個景點(1、2及4)，就已經影咗好多好多相，因為真係好值得觀賞，不得不讚嘆大自然嘅鬼斧神工，所以亦係呢幾日內見到最多攝影愛好者嘅地方。

臨離開前，見到工作人員正在準備熱氣球升空，之後我哋亦坐專車去到出口，再坐我哋嘅旅遊車去食晚餐，返酒店休息，而我和朋友就落去酒店附近間超市買咗個杯麵、青蘋果及一袋小麵包，以備坐高鐵肚餓時食。

仲有就係返上房就開始沖農本方羅漢果沖劑嚟飲啦，因為天氣極度乾燥。

10月25日(第四天)

酒店早餐後，就去參觀大佛寺，裡面有中國最大室內臥佛及藏經閣，現僅存中軸線上的大佛殿、土塔等建築。睇完之後大家都過咗去對面個公園，

，

睇當地長者單手用又長又大支嘅水筆寫大字落地面，而我亦忍唔住借嚟試寫咗“祝大家身體健康！”。
點知睇就容易，揸上手想寫好一個字都唔容易，估唔到我可以寫到咁唔公正嘅字，真係笑死人。

然後又返酒店食午餐，因為跟住就要坐蘭新鐵路和諧號(約7小時車程)去吐魯番，第一次坐高鐵，感覺好乾淨好舒服，洗手間又唔會太細間，每卡車廂都有熱水供應。

途經哈蜜站，大家都落車影下相，

於晚上七點鐘到達吐魯番北站，等候幾位持美國及加拿大護照嘅團友登記過關後，大家就拉喼去坐旅遊巴去食晚餐啦，品嚐新疆烤全羊(身為玫友，當然只係影相，唔敢食啦)，餐廳仲安排咗維吾爾歌舞表演，團友們都睇得好開心，紛紛走出去同兩位表演者影相，然後每位打賞￥10。

食飽後坐車去酒店攞房休息，間房嘅牆紙嘅圖案都係葡萄，因吐魯番正是出產葡萄著名產地。
臨瞓前當然要再飲杯羅漢果沖劑，因第四日就已經有好多團友開始頂唔順天氣嘅乾燥，而開始作感冒，所以飲杯羅漢果清熱潤肺，夜晚都好瞓啲。

10月26日(第五天)

酒店早餐後，出發去中國最熱嘅地方，紅砂岩構成嘅磚紅山脈，夏天盆地內吸收嘅太陽能久聚不散，加上乾燥少雨，氣溫居高不下，真係名副其實嘅火焰山。

亦係相傳《西遊記》中唐僧師徒取經受阻嘅地方，景區有「金剛棒」巨型溫度計，鐵扇公主及牛魔王。

然後坐車去蘇公塔，係紀念清朝一位平定眾亂嘅人物-額敏和卓，仲會睇到維吾爾族傳統圖案嘅圓錐塔、清真寺。

之後參觀古代三大工程之一，並已有二千幾年歷史嘅坎兒井，作用係雪山嘅地下水引進村落和飲用等作用。

繼而再坐車去參觀交河故城，係世界上最古老，而且保存最完整嘅都市遺跡，亦被譽為「世界上最完美的廢墟」。

然後坐車去烏魯木齊，途經見到中國目前最大嘅風力發電站，足足超過15分鐘車程都只係睇到一座一座嘅大風車。

食完晚飯後，坐車去酒店攞房，今次間酒店會連續住兩晚，最開心係住得高可以望到烏魯木齊市中心嘅少少夜景，因為今晚都算早返酒店，所以我哋都去酒店附近行咗一陣。

10月27日(第六天)

酒店早餐後，出發去天山天池國家地質公園。

天氣報告當地天氣比較寒冷，所以大家都著得好厚，懷著好興奮嘅心情去，因為天氣唔錯，無落雪可以坐環保車及電瓶車上去，仲可以坐天池遊船慢遊天池。

午餐亦於天池旁邊間餐廳食風味餐，有雪蓮燉雞煲及大大塊嘅新疆饢餅，仲有支可以拉樽蓋嘅啤酒。

食飽又在出去行下，影下相，因為有太陽，所以都唔覺得凍，反而覺得有啲熱。

之後坐車離開天山，去國際大巴扎位於烏魯木齊市內，非常熱鬧，周圍都要做安檢，覺得做得唔錯，感覺安全好多，又可以睇到當地維吾爾族族民跳舞，

睇到製作饢嘅師傅們，好勤力地製造好多唔同餡嘅饢，好香，不過驚熱氣，所以都只係睇，而無買嚟食。大巴扎市內有好多藥材、乾果、絲綢、樂器、小食…等等，仲有間好大間嘅家樂福。

 

大約六點半，大家集合行去睇第一個自費節目《國際大巴扎歌舞宴》，一邊睇表演，一邊食自助餐，表演者亦會落嚟同觀眾跳舞影相，鍾意跳舞嘅女團友都玩得好開心。睇完表演後，坐車返酒店休息。

10月28日(第七天)

酒店早餐後，就開始坐旅遊車去烏魯木齊站，再乘坐蘭新鐵路和諧號去柳園站，見到一大班軍人亦正等候上車，大家見到軍人都好開心。

午餐於高鐵車內食飯盒，內有牛肉、辣豆腐，不過我都無食牛肉及豆腐，只食雞及白飯(哈哈，食咗一半先記得影相)。

車程大約4個鐘，沿途又見到風力發電站。

之後再轉坐旅遊巴返敦煌市，車程大約2個鐘，然後去食晚餐，

之後去敦煌大劇院睇第二個自費節目《絲路花雨》，歌頌畫工神筆張，以及佢個女英娘，描述佢哋悲歡離合，以及與波斯商人伊努斯之間嘅友誼，演出深受好評，被譽為“中國民族舞劇的典範”，真係值得睇。

散場後坐車返酒店休息。

10月29日(第八天)

早餐後，自由活動，係酒店附近行下，

睇下敦煌市嘅街景，然後又返酒店食午餐，飯後坐車去最後一個指定景點莫高窟，途經見到有好多學生，馬路旁嘅樹亦好有秋冬嘅感覺。

去到莫高窟，被敦煌研究院列為保護文物，所以每日都有限制遊客人數，將遊客分流，第一站必需先去「莫高窟數字展示中心」參觀，然後入兩個館內睇影片，第一部以4K超高清播映嘅「千年莫高」，第二部以圓形球幕立體播放嘅「夢幻佛宮」，講真入到去兩個館都好似入咗催眠館咁，好多人都覺得好好瞓，唔係唔好睇，而係控制唔到，自自然就會瞓著。

之後再坐返景內旅遊車去參觀莫高窟，去到大家都要帶上耳機跟住場內導遊行其中8個洞窟，為咗保護文物，每個石窟都設有二氧化碳濃度監測，如濃度超標便會暫停關閉有關石窟，以及窟內禁止拍照攝影，以保護文物延長其壽命。

之後再返市中心酒店附近，逛下及自費食個蕃茄炒蛋湯刀削麵，估唔到￥14又幾好食喎，

之後再坐車去機場，乘搭8點半班機返香港，飛機上食晚餐，又係焗豬扒飯及一支礦泉水，食完即刻閉目養神，因為返到香港都已經零晨一點幾，等攞埋行李，返到屋企都成三點幾啦，正式完滿結束絲路8天之旅啦！

個人覺得去絲綢之路跟團最好都係揀香港快運有包機團嘅時候去，直航去到敦煌方便好多(5小時抵達，節省好多時間)，今年就由6月至11月，每週一班包機。香港團幾乎都係交由當地同一間旅行社接待，安排導遊帶大家去完成所指定行程，所以無論跟香港邊間旅行社，去到所坐嘅旅遊車都幾乎係一模一樣，又新又乾淨，車上每天都有支裝礦泉水任飲，旅遊車內每人都送一個全新頸枕及禮包一份，包括敦煌小駱駝毛公仔和維族小花帽各一個，連用餐嘅餐館亦幾乎一樣。因有2程乘坐高鐵代替以前長途旅遊巴，即使行程安排走回頭路都唔會覺得太辛苦及浪費時間，而且有包機直航嘅季節，亦正是當地旅遊旺季。至於報邊間旅行社，真係要視乎個人喜好，例如：酒店級數、有冇需要騎駱駝，團費、小費等，如果唔係真係唔係太大分別。

總結：最多人想問我嘅就係，絲路氣候日夜溫差大，又乾燥，紫外線又極高，身為玫友嘅我，又唔搽得防曬，對天氣變化又特別敏感，又唔食得辣，究竟捱唔捱到8日呀？

哈哈，答案係，可以嘅，露天就帶帽及面紗遮擋紫外線，每日都飲多啲水，夜晚飲羅漢果沖劑，每餐只揀唔辣嘅菜嚟食，最緊要唔好亂食，每日早晚洗面沖涼後，都即刻搽保濕，最後就開開心心地完成整個8天旅程啦！等遲啲得閒一定要再去多次新彊，因為仲有好多好靚嘅地方可以去參觀及影靚相，不過一定要申請到一個長假先得。