大棠紅葉

從未去過元朗大棠嘅我，趁12月30日星期二放假，天晴又唔係太凍，即日打電話搵朋友陪我去大棠睇紅葉，大約早上11：30坐港鐵去尖沙咀再轉乘西鐵去朗屏站，

再行去B2出口附近乘坐K66號巴士去大棠山路站，一落車完全唔駛睇地圖，跟住啲人行就可以啦，哈哈～因為閒日都好多人坐巴士去大棠睇紅葉…

落車向車尾方向沿馬路一直行，慢步行大約十五分鐘，再沿左邊石級上，就會見到一個好靚嘅燒烤區，真係好適合一家大細去郊遊野餐燒烤嘅好地方!

今次見到咁靚嘅燒烤爐，忍唔住擺獅子座黃金聖鬥士艾奧里亞於爐邊影返張相先!

然後再沿路一直行上去，約十五分鐘後，見到有啲紅葉，以及有好多遊人...

沿途有好多攝影愛好者，仲見到有攝影師帶埋女模特兒去影相…




哈哈~而唔識影相嘅我，再次攞艾奧里亞出嚟影相…

最估唔到嘅係…閒日都有咁多人上去，可想而知假日會有幾多人去…

離開時再次經過燒烤場，見到有一個好特別嘅圍牆，行過去睇…仲可以望到十八鄉全景!

然後再行返原路出去搭返K66巴士去朗屏西鐵站，去到天都開始黑了，如果下年再去，我一定要早啲出門，仲要帶多嘢食去野餐…哈哈~實行玩足大棠一日遊!