一代宗師

上星期有位朋友問我有無興趣睇"一代宗師", 我諗都無諗就應承咗. 最主要係想睇吓王家衛所謂醞釀咗17年、籌備長達8年、 拍攝3年嘅葉問...究竟會係點樣嘅呢?
至於D電影海報就真係影得好靚啦. (以下海報全來自Yahoo圖片)



講真...我一直對這套戲...都無抱太大嘅期望, 只係好奇心驅使我入戲院睇個究竟!



閒日下晝睇戲嘅人真係好少, 入到戲院感覺好冷清清, 令人覺得套戲都唔方好睇, 仲好擔心片長2小時10分會唔會好難捱呢?



最後...我竟然會覺得唔夠喉, 估唔到無期望竟然真係有驚喜, 2個幾鐘嘅片長都覺得短, 真係拍得好靚好精彩, 可惜有D嘢交代得唔夠清楚, 特別係張震飾演北派八極拳宗師一線天嘅戲, cut 到唔知想點...

 
不過...幾十蚊可以睇咁好嘅製作, 真係超值抵睇!
相反我個朋友就覺得好悶, 中間有一段...佢仲悶到瞓著咗.
哈哈~估唔到兩個人睇一套戲都真係會出現咗近期所講嘅口碑兩極化.



幸好我哋都有共同嘅睇法, 就係服裝、 場景及拍攝手法都做得非常之靚!
成套戲最似一代宗師嘅竟然係章子怡飾演嘅八卦掌掌門宮二先生, 真係好搶戲!





今日聽聞有個四小時足本, 真係好想睇! 不過到時就唔知有冇朋友肯陪我睇囉...