半島酒店露台餐廳 (Verandah) 食半自助餐

第一次同媽咪及細妹去尖沙咀半島酒店內嘅露台餐廳 (Verandah) 食半自助餐, 坐低後...個男侍應就問我哋駛唔駛飲D汽水/橙汁先...結果我哋叫咗兩杯橙汁及一支可樂, 埋單才知可樂一支$65, 橙汁一杯$75...(最可惜係無提供飲品餐牌...)

自助餐有沙律, 魚生, 壽司, 甜品等等...都係出去任攞嘅, 而餐湯就二選一, 有鴨湯及薯仔忌廉湯, 主菜有四款可以揀, 主菜個名...3母女點菜後都已經忘記晒喇~
只記得妹妹要"牛柳", 媽媽要"鰽魚", 而我就揀咗個比較清淡嘅"龍脷柳". 哈哈~~主菜份量唔算太多, 不過都已經食得好飽, 可能係食咗太多前菜!

當食緊主菜時, 有四個男侍應, 分別走嚟問"主菜好唔好食, 啱唔啱食?" 第一個我覺得好有心, 第二個我開始覺得係指定工作, 第三個...哈哈~感覺太公式化喇~第四個...唉~開始覺得煩... 可能係個人比較唔慣...

之後仲有一人一個嘅梳乎里, 嘩~真係入口即溶!! 之後再行出去攞甜品及生果, 雖然甜品款式唔多, 不過都好有水準, 特別係自家制嘅雪糕, 好滑好好味!!!
食完之後, 再嚟埋坏餐飲, 仲有一碟曲奇及朱古力...

自助餐 $558一位, 另收加一, 飲品另計, 最後總數係 $2077.90.

總結: 食物款式唔多, 服務人員多, 環境清靜舒適, 有衣著限制, 要人服侍嘅及啱啱開始熱戀嘅情侶...就會可能鍾意去食, 如果想一班人去食buffet , 我會建議去洲際, 除咗景靚, 最主要多嘢食過半島好多!!!