無名指

 

嘩，時間真係過得好快好快！接近3個月無寫網誌，今次忍唔住又要分享下昨日睇嘅一套好戲，名為《無名指》。之前從未睇過任何宣傳，只係咁啱8月22號放假，難得天晴無落雨，就決定帶媽去睇戲，上網見到上映緊嘅戲，睇埋電影預告片後，就決定睇《無名指》，隨即網上購買電子戲票。

套戲片長只係個半鐘，節奏明快，雖然唔係大製作，演員亦唔多，主要都係郭富城、許恩怡及鮑起靜，而3位都演得好好，演出照顧者及被照顧者嘅心情、壓力、怨恨、逃避...等等嘅情緒，令在場有好多女士們感動流淚。

起初我以為無名指係形容帶上婚戒後嘅承諾，原來係形容患有肌肉萎縮症嘅女主角，最後只剩無名指一隻手指嘅力量，去驅動電動輪椅。

套戲啱啱至上映，就已經攞咗本周開晝新片票房冠軍，真係犀利！所以我都唔劇透太多啦。

總結：生命保貴，珍惜身邊嘅所有，包括親情、友情、時間等等。遇到任何困難都唔好怕輸，勇於面對及承擔，一定會比逃避過得更加好！

仲有我好希望香港所有舊商場及大廈進行大維修翻新工程時，都可以做到加建無障礙通道！

最後要向幾位玫友講聲「唔好意思！！」呢兩個半月嚟，都唔得閒覆你哋問題，以及呢幾個月都無寫網誌，原因我左手突然患上狹窄性肌腱滑膜炎（俗稱：媽媽手），右手又有啲唔舒服，搞到我好多嘢都無辦法做，現時每星期去物理治療師度一次，做（左手）微電流及超聲波治療，暫時好咗少少，最開心係可以攞起碗嚟食飯及左手幫右手剪指甲，等遲啲得閒再記錄媽媽手一事。

並祝所有人都身體健康！生活愉快！