九龍城潑水節

係地鐵站嘅月台，見到燈箱廣告，4月9日九龍城有個「龍城潑水嘉年華」，咁啱下晝得閒，就同媽咪去睇下。

第一次搭港鐵去到宋皇臺站，上到閘內大堂位置，見到好多歷史文物，可惜時間關係，無停留欣賞。

繼續跟住指示牌一直行，行到去城南道附近，已經可以聽到好多笑聲，行近一睇，見到好多人揸住水槍射水。

在場無論大人或小朋友都被射到濕哂，個個都好開心，因為泰國習俗，互相潑水可以洗走過去一年嘅衰氣。

見到兩旁嘅店舖都企滿人，而放係街道上嘅大水桶，亦都已玩到無哂水。

後來再行去賈炳達道足球場，去到見到有好多攤位，有泰式小食、按摩、泰拳、泰服、浴佛等等，

原本諗住買小食試下，可惜唔收任何$，只收換領劵，而呢啲換領劵真係有錢都買唔到，去到詢問站時，已經派完，所以我哋都只係行咗一圈就離開喇。

離開九龍城之前，點都搵間泰國菜館，食啲嘢先走。

哈哈，感覺就好似去咗泰國半日遊。

總結：氣氛好正，好想玩埋一份，可惜無帶雨褸，所以唔敢行得太近，而且今次去到嘅時間，真係晏咗啲，下次如果再去睇，真係要早啲去到，可以睇埋泰式歌舞及潑水節小姐選舉。