尋找你我他的皇都

好開心收到邀請，可以參加「尋找你我他的皇都」歷史體驗活動，而且仲可以攜同一位親友入場。咁難得嘅機會，當然係帶媽媽去啦！

當日我哋好準時就去到北角皇都戲院，見到商場外牆嘅「全院滿座」海報，係由一位90後「無紙用工作室」畫家林嘉恒所創作嘅，包括場內多款海報。

入場時職員就幫我哋登記健康申報表，然後於售票處感受下以前買戲票嘅過程，攞咗模擬當年嘅戲票後，就正式開始跟導賞團入場內參觀啦。

原來將皇都戲院商場內嘅其個舖位，改咗做臨時展場，介紹戲院嘅歷史。

其中一間變成皇都戲院前身為「璇宮戲院」創辦人歐德禮(Harry O'Dell) 嘅辦公室。

其中一間舖，就展出北角係20年代嘅油庫、發電廠、倉庫、月園遊樂場、麗池舞廳嘅舊相。

1940年代大批上海人聚居北角，當時北角又叫「小上海」，70年代才改叫「小福建」。

仲有場內可以睇到過百件珍貴舊物，都係由保育團隊3年前搜集返嚟嘅收藏品。

皇都戲院嘅天台「飛拱」被喻為全球獨一無二嘅建築設計，所以場內設有一個霓虹燈製嘅「飛拱」模型，俾參觀者影相留念。

咁啱見到有幾位著旗袍嘅女士，哈哈，令人更加覺得返咗去50年代。

仲有間「偉倫唱片」專賣黑膠碟、卡式帶及鍢射唱片，聽說係當年熱愛音樂人嘅朝聖之地。

其中一間髮型屋，位於商場內，店舖裝修設計到好似街舖咁，裏面嘅擺設，相當懷舊，反映舊香港歷史文化。

商場內鐵閘上嘅字，係由一位80後「抒發」專頁創辦人陳家浚，以3種書法字體寫上有關皇都戲院嘅一事一物，例如：創辦人歐德禮、落成日期、皇都戲院最後上映嘅電影《一個好人》等。

當年將戲院改成桌球室，為咗慳成本，原來係無大改動過戲院結構，只係將戲院嘅座位用圍板封起，升高做咗地台及加假天花，結果可以俾皇都戲院更容易復修大部分原貌。

總結：今次「尋找你我他的皇都」整個活動，無論人流控制、場景及燈光設計都做得好好！仲有場內負責導賞團講解嘅男職員，講得清晰及生動，完全唔覺得悶，約半小時嘅導賞團，真係上咗一個好寶貴嘅歷史堂！

最後真係好多謝Culture for Tomorrow創辦人鄭志剛先生及其保育團隊嘅努力，

希望復修後嘅皇都戲院，到時可以引入更加多嘅精彩節目及文化活動，可以俾更加多嘅人認識保育嘅重要性！

 

期待不日放映「皇都好戲 尚未完場 二0二六 興您再續」