齊心抗疫

2月中我和妹妹夾份訂咗一批細細支50ml嘅酒精搓手液，等咗大約十日，終於運送到屋企啦。呢幾箱嘅搓手液，我哋係買嚟送俾為大家服務嘅清潔工人們，希望細細支方便俾佢哋攜帶使用。

而我哋就趁放假出去派送，無指定嘅地點，只係搭地鐵去到灣仔，然後步行向東行，沿路見到做清潔嘅工人，就每人派送一支，行到筲箕灣東大街為終點。

派咗4日，每次都派得好開心，因為經過今次嘅接觸，我發覺原來做清潔嘅工人好多好多都好有禮貌，佢哋會除手套，雙手接支搓手液，仲好有禮貌地講多謝及祝我身體健康...等等。

而其中有一日，我係派嘅時候，都見到另外有一啲有心人派緊防疫用品俾清潔工人，令我更加覺得香港真係有好多好人，希望大家加油，疫症期間，真係每個人都唔好怕悶，一定要乖乖地做足防疫措施，戴口罩、勤洗手、暫停所有聚會及活動。

呢段期間，我妹都買咗好多防疫用品，而市面上亦開始容易買到有消毒酒精嘅清潔用品，不過口罩就仲係好難買到，就算有都好貴，唯有每日留意網上最新口罩售賣消息。

最後當然提一提親愛的玫友們，疫症期間，加上冬轉春，皮膚都特別容易敏感，所以更加要小心保重身體，每日都要做下伸展運動，唔好亂食嘢，多飲暖水，每日最少兩個生果，仲有一定要戴口罩及勤洗手，身體好，皮膚都無咁易敏感，加油呀！