汶萊 4 天遊

3月放大假，今次兩姊妹帶媽咪出去玩，首選行程舒服唔辛苦，天氣又唔要凍，空氣又要好，仲要係未去過嘅地方，又唔需要簽證。哈哈，最後我就揀咗個禁酒禁煙無夜生活嘅汶萊啦。

今次我係無去旅行社報名，全部都係經網上報名。揀咗較容易成團嘅永安旅行社，當報名後，確定成團後，才網上買旅遊保險。

然後準備新加坡貨幣，因為汶萊可以用新加坡紙，通用一對一，當用新加坡紙，佢哋會找汶萊幣。

然後於KKday買機場快綫(香港站來回)電子票(每人$135)。

3月13日(第一天)

三母女食完早餐後，大約11點才出去坐港鐵再轉機鐵。去到機場C區搵旅行社職員攞機票辦理行李寄艙後，就隨即入禁區辦理出境手續，然後兩姊妹都去近1號閘口嘅RELAY免費換領雜誌一份，

然後三母女就入側邊間PLAZA PREMIUM LOUNGE食個輕量午餐，再坐無人駕駛去閘口。 

乘搭汶萊皇家航空準時14：55起飛，最開心汶航有得睇各國電影、電視、音樂等等，而且空中服務員，無論男女都好有笑容，服務態度簡直一流！飛機餐亦比我想像中好食好多。







大約三小時就抵達汶萊國際機場。辦理入境手續後，攞埋行李，就同當地旅行社(美爵之旅)接我哋嘅導遊報到咗先，才行過去買張電話卡，現只有汶幣$25旅客手機卡，7天有效期，無限數據，仲可以無限當地通話，如果唔係驚人哋搵唔到我，其實酒店都有免費WiFi。



今次成團都只係得8個人，竟然都有架大旅遊巴嚟車我哋，第一個行程去加東夜市，入面好多地道小食，生果，飲品等，價錢仲好平！

然後去食馬來風味晚餐及馬來拉茶，間餐廳好靚，嘢食又好特別，唔錯！

之後去連續住三晚嘅WAFA hotel酒店休息啦！

3月14日(第二天)

團友有啲一早起身係酒店游水，而我哋就8：30落去酒店食早餐，食完返房攞嘢，

十點出發去今日第一個景點水晶公園 (Jerudong Park)，觀賞8.5噸大水晶，不過天氣實在太熱啦，紫外線極高，大家影完相，隨即上車去下一個景點，

途中又見到昨晚去過嘅加東夜市。

好快去到第二個景點，蘇丹登基銀禧紀念館 (Royal Regalia Building)，入去一定要脫鞋
，

 

紀念館擺放咗好多國家送嘅紀念品及蘇丹皇登基時所坐嘅人力巡遊花車。

第三個景點就係去蘇丹皇宮門口影相。

第四個景點去到傑米清真寺(第29任國王清真寺)，共有29個鍍上24K金嘅圓頂，中東大理石，意大利入口雲石，可惜只可以外觀，唔可以入去，因為逢星期四、五及禱告期間全部清真寺都謝絕非穆斯林入內參觀，不過外觀都已經覺得好豪華。

然後就去Radisson Hotel食自助午餐。

第五個景點就係坐船去有東方威尼斯之稱嘅汶萊水鄉，上去其中一間木屋內品嘗地道糕點。

然後坐船去返對面岸嘅商場內，睇汶萊土產店，店內有馬來民族服裝可供免費穿著及影相。

最終第六個景點就係去奧瑪阿里清真寺(第28任國王清真寺)外觀，採用白色建築，主拱頂鍍上純金，以及有一個人工半圓湖，湖上有一艘馬來風格嘅蘇丹龍舟。

影完相後，就食一人一煱，有成35種調味料任揀，8人包咗成間餐廳。食完又可以望到清真寺嘅夜景，然後坐車返酒店休息。

3月15日(第三天)

至於第三日係全日自由活動，旅行社有兩個行程俾我哋揀，大家都揀咗中午去帝國酒店食下午茶及睇日落，包大旅遊巴接送，汶幣每人$65。

朝早無地方去，大家都放慢動作，9點幾至落去食早餐，然後係酒店下面個大超市，睇下當地人點樣買菜買肉，至於零食都係入口貨，所以價錢都同香港差唔多，行咗一陣，就上返酒店坐下，因為逢星期五，所有店舖中午12：00至14：00都唔可以營業，全部落咗閘。

而我哋今日唯一嘅活動，就係一點鐘由酒店出發去帝國酒店自由活動及於2：30至3：45食英式下午餐，杯香檳都係無酒精嘅，所以飲品、糕點及三文治食完都可以免費再加，食完大家都於酒店參觀影相，直至睇埋日落，再坐車返酒店。

於酒店內自由活動到日落，於6：45才上車返入住嘅酒店，

我哋三人落車後，就去商場內間泰國餐館食晚飯，叫咗4款嘢食，都只係汶幣$29，餐廳職員個個都好有禮貌，仲問我哋好唔好食，講真…真係好好食！食完返上酒店收拾行李，梳洗後就馬上瞓。

3月16日(第四天)

一早就起身梳洗，落去食早餐，然後8點上車出發去機場，乘坐10：30班機，11：30食飛機餐，大約1：30到香港。

總結：因為人數少，所以亦無香港領隊隨團，只有去到汶萊機場有一個當地導遊接機。大家都覺得呢個安排幾好，真係唔需要多一個領隊跟住，最開心係服務小費亦只需付一半。今次大家都玩得好開心，團友個個都好好人。而天氣亦比我哋預期中好，完全無落過雨，當地人樸素平實又友善，可能因為國家福利實在太好，市民都無煩惱，所以笑容都特別親切，汶萊真係一個好啱一家大細渡假嘅好地方。

補充：汶萊位於婆羅洲北岸，人口只得42萬，佔地比香港大5倍。汶萊一直都好難成團，如果自由行亦好唔方便，因為當地人幾乎個個都有私家車，石油平過蒸餾水，泊車又唔需要俾錢，所以全國暫時亦只係得大約60架的士，唔會係街搵客，差唔多都要靠酒店安排叫車，而且收費唔平。所以跟團就最實際，就算跟團同自由行都唔係太大分別，因為每朝都唔需要好早起身，又唔需要好趕，每個景點都只係位於斯里巴加灣(Bandar Series Begawan)，十幾分鐘至半個鐘車程，最主要當地旅行社安排嘅旅遊巴士真係超大又乾淨，舒服過坐的士。

自由行和跟團都係無得揀航班時間，因去程只有BI636 14:55起飛，回程亦都只係得BI635 10:30起飛。淡季每個境點都唔會太多人，就算去餐廳食飯，都唔覺得似食團餐，去嘅餐廳都從未遇過其他團，都係同當地人一齊食，所以都唔覺自己跟咗團。