麥當娜（Madonna）香港首場演唱會

估唔到我於2016年睇嘅第一個演唱會，竟然就係樂壇天后麥當娜 (Madonna) 香港首場演唱會，好開心佢終於肯嚟香港開演唱會，明知佢例遲嘅我，七點鐘就已經到達亞洲博覽館，感受場館內嘅氣氛，原本想睇麥當娜嘅蠟像，點知去到才知道，即日經理人公司要求停止展示蠟像，唯有周圍影下啲人排隊買記念品及影相嘅情況。

行行下見到成班娛樂記者係度等明星及名人嘅出現，當有發現，佢哋就好快衝前做訪問，而我亦趁熱鬧咁影咗幾張相，有蔡一傑、廖碧兒、梁烈唯、陳敏之及賭王四太梁安琪。

 

之後入場坐無幾耐，DJ MaryMac 竟然播Beyond 嘅海闊天空，令到在場觀眾都好多跟住唱，以為播完首歌後，就係差唔多會開騷，點知都係要等到差唔多10:15才正式開騷，當麥當娜一出場，全場都企哂起身，原本可以好清楚睇到成個舞台嘅我，因為身高問題，俾前面嘅觀眾遮咗，唯有郁嚟郁去搵位睇，大家都企足兩個幾鐘，最可惜唔可以帶相機去影相，因入場時會檢查手袋，所以我都唔敢帶，但係表演期間竟然發現有人攞咗部單反出嚟影相，真係唔知點解佢會帶到入場，可能係佢識得門口檢查手袋嘅職員，不過如果買到靚位嘅觀眾，用手機都可以影到近距離嘅靚相，因為Madonna 都好玩得，經常都行到舞台邊位，近距離接觸到觀眾，係台上嘅一舉一動真係好有天后風範。

最值得一讚嘅係音響，真係我暫時聽過嘅最好聽嘅音響，之前係亞博聽過Pet shop Boys 嘅音響都無咁正。

 

總括：係值得去睇嘅演唱會，唯一覺得坐位編排有啲問題，好容易令到啲人亂咁企，由平位插入貴價位，而呢個情況紅磡體育館就比較難發生，所以亞博應該檢討有關問題，亦發現入場前檢查手袋職員人數就足夠，但入場後，館內職員就好少，可以飲啤酒睇嘅演唱會，我個人覺得場內應該要再加多啲職員。