銅鑼灣皇室堡Red MR VS 糖街CEO

6月16日(星期日)同幾位歌友去銅鑼灣皇室堡Red MR 唱K.
以往人多嘅時候, 我都係訂尖沙咀港晶Neway, 好多時都可以由11點唱到下晝4點.
而今次我揀嘅日子咁啱係父親節, 有幾位朋友都唔得閒, 人數亦比較少...所以我就決定改去銅鑼灣區唱K, 搭車亦比較方便!
於是我提前係6月11日夜晚打去CEO問時間, 點知個女仔就話...一至八人都只係可以唱最多3個鐘(11:00-14:00).
跟住我就即刻打去皇室堡Red MR 問...竟然可以由11點唱到下晝3點, 即係可以唱多CEO一個鐘! 最令我欣賞嘅係皇室堡Red MR 聽電話個女仔, 服務態度真係比起CEO嘅好得多! 因此我就揀去皇室堡Red MR 啦!

 6月16日朝早大約10:30 收到皇室堡Red MR 嘅電話, 係提我訂咗房嘅時間, 而個女仔亦都係好有禮貌!
當然鍾意唱歌嘅我...就一定超準時到啦! 而另外5位歌友亦難得地準時嚟到!

原來佢哋大部份都未去過皇室堡Red MR 嘅~
當佢哋見到間房可以望到維園, 以及仲有免費熱嘅綠茶提供, 再加上房內有獨立洗手間, 就已經好開心啦!
當一開始唱歌嘅時候...佢哋就係咁讚D音響好正, 好似開緊迷你演唱會咁...個個都唱得好開心!! 
而我就覺得好似去返以前9樓嘅 Red Box Plus 咁...感覺超正!

最驚喜嘅係今次竟然可以食到Red MR 好出名嘅博多拉麵! 真係好好食, 特別係隻溫泉蛋...嘩~超正!

總結: 銅鑼灣皇室堡Red MR 服務態度及音響都好過糖街CEO好多好多!
所以經過今次之後...歌友們都話以後都會去銅鑼灣皇室堡Red MR 唱K.