台中自由行 4天

好耐無同好友們去旅行, 而今次大家只有四月份可以安排到4日係一齊放假嘅日子, 最後揀咗去台中4日自由行.

而現時申請台灣簽證比起以前真係方便咗好多!

可以自己上網免費申請 https://nas.immigration.gov.tw/
仲可以即時睇結果,
只需自行列印入境及出境登記表許可證各一張, 連同有效特區護照入境. (即至少尚餘六個月有效期)
而簽證有效期係三個月, 可停留台灣三十天.

另外如果唔係香港出生仲要從未去過台灣嘅人, 就要去香港金鐘道89號力寶中心第一座4樓中華旅行社辦理台灣簽証, 需要收費及要等大約兩星期辦理時間, 台證會由台灣寄回香港, 如果係十月份去台灣, 可以提早上去辦理雙十節台證, 免費申請 (不用收費)...

香港去台中真係好方便, 我哋睇咗華信航空往台中航班時間表之後, 當然揀咗最早班機去台中, 然後揀咗最晏班機返香港.

之後買咗一本"優悠活力闖蕩 Easy Go! -台中" 2012年1月第二版, 揀咗幾個景點...之後去到台中再視乎當時天氣再作安排....

而我哋係臨出發之前兩日, 睇咗百年找換店兌換新台幣參考價後,  先至上去中環德輔道中 61-65 號華人銀行大廈1703 室,  換台幣...
http://bcel1985.blogspot.hk/

第一日(23/4)：

早上10:10由香港搭乘華信(AE1820)去台中, 於11:40 到達台中清泉崗機場.

一個超細嘅機場, 攞完行李後...一行出去就已經見到"台灣大車隊"隊員- 蘇俊明, 佢第一時間就問我哋需唔需要換錢, 因為台中機場都可以換新台幣...估計應該都唔會相差太多...而我哋都在香港換咗...所以可以好快上咗佢架車...今次由佢負責接送我哋4人, 由機場去到日月潭 ( 收費台幣 1500).

包車直達日月潭, 時間真係可以慳返好多...而這位司機"蘇俊明", 我個人好欣賞佢...因為佢唔會好似其他司機咁...係車內"狂賣廣告", 所以我下次再去台中一定會再叫佢車!

悠遊接送 蘇先生 0915252080  Email:a0915252080@gmail.com
 

台中Taxi 旅遊包車一日遊 烏日高鐵 桃園機場接送 清泉崗機場接送

http://tw.myblog.yahoo.com/ taxi-0915252080

第一時間入去水社海渡假民宿, 寄放行李, 因為比起預計嘅時間早到咗日月潭...民宿職員即刻問我哋有冇趣, 買套票...坐船遊湖 + 坐纜車到九族文化村 (收費每人台幣 400), 超值!

大約下午1:30 , 4人由日月潭水社碼頭乘船去伊達邵碼頭, 沿路行上去搭乘日月潭纜車....

坐纜車到九族文化村, 不過今次就無入去玩喇, 因為前幾年去過, 感覺一般...所以今次無入去喇。

遊完湖, 突然落大雨...唯有留係民宿休息一陣...房內有部水機, 超方便唔駛煲, 一按就有熱水及凍水.

第一次住台灣民宿, 感覺好舒服...好適合早出晚歸嘅自由行人士入住, 價錢平, 又近碼頭(不過只望街景), 如果想望湖景...就要搵其他民宿喇~http://www.smlhotel.com.tw/

原本想行出去睇螢火蟲, 可惜一直落大雨...哎~唯有行出去食晚餐, 行咗一段時間...
最後大家都揀咗"日月餐坊", 因為見到店內有好多人客, 而且感覺清潔...最後我哋叫咗個"總統魚套餐", 條魚實在好多魚骨, 個人覺得不係太好食, 比較一般, 其他餸菜都幾好! 

   

第二日(24/4)：

零晨 4:30 起身, 然後行出去碼頭想影日出, 突然見到有個亭...上面已經有人擺咗腳架, 等影日出...
我哋3人隨即路趕上去...好彩都俾我哋睇到咁靚嘅日出, 雖然影得唔靚, 但總算親眼睇過, 已經覺得好開心!!!

大約6點鐘, 3人行返去民宿休息一陣...跟住4人落去食早餐,  大約10:15坐的離開日月潭...而今次叫車係由"水社海渡假民宿" 嘅職員代為叫嘅的士, 因為我哋有3件大行李, 所以坐的會比較方便, 仲可以慳返好多時間, 沿途司機相當風趣...未停過...一直講笑話...

哈哈~~所以好快就去到"車埕", 收費係台幣1000.




揀去"車埕"行一陣...再坐台鐵去到 "集集火車站".

集集火車站周邊, 有好多單車出租, 而我哋去到集集鎮, 第一時間走去旅遊中心, 寄放行李後...朋友就已經急不及待地去玩小型賽車...

賽車場旁有間餐廳, 入到去感覺好舒服, 職員好親切...
當我哋攞本優悠活力闖蕩 Easy Go! -台中" 2012年1月第二版, 指住想飲本書所介紹之"什果特飲"時...
職員反問我哋本書是否已出咗好耐...因為入面嘅資料一早已經變晒! 冇出"什果特飲" 及"香蕉故事館餐廳"嘅標誌都已經改咗...
(其實本書係前兩星期係商務買架...點解本書嘅資料會咁舊架?)
所以自由行, 最重要係去到當地問人及攞當地旅遊指南!食完嘢...就走去攞行李, 跟住趕搭 (2:36PM)班台鐵去台中火車站.


去到火車站, 照本書嘅指引行去"奇異果快捷旅店", 嘩~點指行十分鐘, 推住行李起碼要15-20分鐘, 入到去個感覺, 唔好!




所以有時真係唔好相信D相...仲要係香港大部份旅行社自由行package 內都有得揀嘅旅店, 估唔到會咁差!!!

其中一間房, 無窗! 貼咗一幅大相, 睇相仲以為好靚, 點知完全唔掂!

床單有毛及頭髮...打去要求轉房, 可惜只有3樓才有房, 最後...只係要求重新更換所有床單及被單, 然後搭車去台中嘅巴黎香榭大道"精明一街" 嘅"春水堂"見偶像, 台灣攝影大師...佢真係好熱情, 請我哋飲嘢食嘢, 仲同我哋吹咗6個鐘頭水...影咗幾張合照...嘩~真難得!  陪到我哋12點幾...

之後我哋坐的士返旅店瞓覺, 而我瞓覺之前都有個習慣為手機及相機充電, 而台灣一般使用兩腳插頭, 香港三腳插不能用, 所以我一早係香港買咗兩個旅行用嘅轉換插頭. (2個合共HK$12)

第 三日(25/4)：

早餐後, 行去台中火車站20號倉庫...

嘩~~真係後悔無聽台中朋友講...20號倉庫係一個超悶嘅地方!!!

入到去仲要扮有藝術, 因為有一位超熱誠嘅藝術家, 好用心地同我哋講解...唯有自我投入, 盡量發揮幻想力...好彩...我都講得幾句...而其中一位朋友, 幾乎想瞓著...哈哈~



然後4人搭乘台鐵去彰化火車站, 第一時間就行去搵扇形火車站...沿路問人, 見到個"民生人行地下道"行落去...另一個出口一出, 就見到火車站入口, 於門口登記完, 便可以自由影相...(免費入場)

之後搭公車去鹿港鎮, 首先去"老龍師肉包", 食咗個好好味嘅豬肉包!
跟住去咗對面嘅"鼎泰興水蒸蛋糕懷古餐廳", 食午餐及食水蒸蛋糕...之後再去"龍山寺" 影相... 

再坐返公車去彰化 (那些年, 我們一起追的女孩) 拍攝地方, 去到彰化一定要去食阿彰肉圓, 口感QQ, 值得一試! 





跟住行去彰化木瓜牛乳大王, 而我當然係飲杯木瓜牛乳喇~正!!


之後聽個肥仔所建議嘅行去八卦山睇彰化夜景, 當行到山下, 竟然落大雨...遇到一個女仔, 佢叫我哋唔好上去, 因為佢覺得唔靚, 仲好無聊...哈哈~最後...我哋4個傻人, 都係照上...估唔到比想像中靚, 哈哈~好彩!

行完八卦山之後, 我哋又趕去彰化火車站, 搭8:10班車返台中火車站.

 去到台中火車站, 行過對面, 原本想坐公車去"中華夜市", 點知落大雨, 唯有向旅店方向直行, 希望可以搵到貴夾唔飽嘅嘢食... 點知一直行...都無嘢食, 最後行到無雨, 而我哋最後竟然行到"中華夜市"...哈哈~~真係好好笑!

咁多晚食的最多嘢嘅竟然就係"中華夜市"...飽到肚漲...

而食飽...最好就係散步, 我哋行咗兩條行口, 就返到旅店休息啦~

第四日(26/4)：

早餐後行台中市, 須便買去"魏清海太陽餅老店" 買手信...

之後行過一間"台北永和豆漿大王", 飲豆漿及食小食...超正!

再去行天后閣,

 之後再坐的去行西區...去小王子童話廚房食午餐...

下午4:15 我叫的士司機車咗兩位好友去台中火車站先, 因佢哋要搭台鐵再轉高鐵去台北玩多幾日, 之後再車我哋去台中機場.

 而呢位女司機超多嘢講, 聽到我都暈車浪, 全程硬銷佢嘅好處...幾乎嘔出嚟...(真係暈車浪!)

好彩唔駛30分鐘就到達台中機場, 搭乘華信AE1831 返香港, 竟然仲可以坐係飛機度影日落...哈哈~好開心! 

大約8點到達香港, 今次4日台中自由行完滿結束!